موقع قبائل بني يزناسن يرحب بزواره الكرام

 

 

                                                           

2

نبغيك آ خضرا

 

نبغيك آ خضرا

عشبه عشبه

من عشابك

حلوَّه شهْد كانت

 ولاَّ حدْجه  ُمره

رطبة كانت

 ولاَّ مشوّْكه سدره 

نبغيك آ خضرا

ذره ذره

 من ترابك

حبه ولاَّ طوبه

صخره ولاَّ  حجرة

من احجارك

زهره زهره

 من ازهارك

مزيـّنه  وسط  دارك

 ولا  ف خْلا  نابته  حره

فايضه  بـ خيرك  وخميرك

 ولاَّ  كنتِ  خاليه  صحرا

نبغيك  آ خضرا

كنت انا ساكن فيك

 أو كنت مغرَّب برا

نبغيك  يا عذرا

يا مليحة النظره

راه حبي ليك

نازل من السما قطرا

بفضل العالي لكبير

تروي بـ رشاشها بذره

البذره تكبر تكبر

حتى توللي  شجره

والشجره تلقَّح  شجره

وتتعودي ليَ  جنتي خضرا

نسميك  جنة " لالَّه  خضرا"

  تكوني بيَ وليَ

و نكون بيك وفيك ف ذا لدنيا

   احباب حُرّ وحُرَّه

ونتشوق بيك لـ  ذيك الجنة لاخرى

ونكون  أنا   جارك

ولاَّ طير من اطيارك

نحوم     ف سماك

وما نشرب غير من ماك

وما نتشهى غير اثمارك

ونقيل هايم نايم وقايم

نغني ب بابك واعتابك

احلى  اشعاري و اشعارك

ونحكي ما عرفت وخايلت

الحاضر واللي فات من اخبارك

نشهَّر بكنوزك واسرارك

يشتاق ليك   للي يبغيك

غريب  غير  سامع  بيك

و لاَّ حبيب درﮔـاتو غَبْره

نبغيك  آخضرا

غرام  عقل وفَكره

وهْيام هْبال وحيره

 

 ملحوظة :  خضرا هي لالة خضرا الاسم الشعبي للركادة

شريط فيديو لعين الركَادة ( لالة خضرا )

 مع قصيدة زجلية لمجذوب خضرا الأستاذ عبد المالك المومني
توثيق بتاريخ 01 ماي 2018

 

 

                                                           

 الدكتور عبدالمالك المومني

 

 

 

 

 

 

 

 

 

صفحة الأستاذ عبدالمالك المومني

1 - ذيك الدار

2 - نبغيك آخضرا

3 - تريفا ياناس

4 - الجمرة

5- زڭزل

6- ف حضرة لحباب

7- مجدوب خضرا

8 - التحويسة

9- سَّمعي يالطرشه

10- وحش لغريب

11- يارايح للعين

12- ياذاك لعليل

13 - الثلج ف جبالي

14 - هْوا خضرا

15- مقام

16 - زهرة بنعمان ياعشران

17 - عرس لمنابع

18- رمان الدار

19_حجاية لاله خضرا

20- منامة لعمر

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

عُشاق خضرا

مطارحة زجلية: جمال الدين حريفي وعبد المالك المومني

عبد المالك المومني

مياهك يا لمحبوبة لالاَّ خضرا** نبتت مني من فيضها وخيرها شجرا

طويله ضليله معرشة لغصان*** تين وزيتون ورمان ما احلاها ثمرة

جمال الدين حريفي

واه واه زيد دلي من غصانك ** وعطينا من شجانك ثمرا

عبد المالك المومني

خير خضرا راك ريتو مدفّـﮔــ ** عزم أصاحبي وزور ولو غي مَرَّه

جمال الدين حريفي

ايلا نادات لا لة منكولش الاَّ

ولا عيَّط سيدي منعاودش الهضرا

تَمَّ ندير الحباب

وتم ندير الصحاب

وتم نجدب ونتحير

وتم ندير الحضرا

تم تعرف شكون المسكون

وشكون المجنون

وشكون المتيم بهوى ديك العذرا

وشكون اللي يبغيها وشكون اللي يفديها

وشكون اللي روحو ما

وشكون اللي قلبو جمرا

خضرا معنى وخضرا حكمة وخضرا كلمة ** خضرا ماهي قبة ماهي ما ولا مرا

وقلت لك مرة وميات مرة ** سعدات خضرا بيك وسعداتك بـ خضرا

ماكاين اللي يضاهيك فالحب الفريد ** ومكاين اللي يزايد عليك بحرف وفكرة

خضرا مولاتك وانت مولاها ** انت نهار هي شمسو وهي ليل وانت القمرا

ويلا هي كلمة تكون انت معناها ** ويلا هي واحةونخيل انت رمل وصحرا

صحرا عطشانة للما والخير ** يا ربي ترويها وتسقيها من ما خضرا

عبد المالك المومني

روحي ما وقلبي جمرا ** يا آخر عشيق ل لالاَّ خضرا

احذر لا يدّيك هوا هاخضرا ** ولا يجرك بعيد وادها جرَّه

هاك كتاب "الحاسي" للخلادي ** فتح وانظر وتمعن واقرا

"قيل هواها لا تعذبك يا عشير**من ماها -ﮔال- تحذرا

خضرا ما ليها عشير" ** نزيد أنا ليها غضبه وليها نفرا

جمال الدين حريفي

الصلاة والسلام على اللي قرا البرا ** وفهم المعنى واروى الفكرة

راه المغروم ما يخشى ما يخاف ** راه الحبيبة وفية ما تخون العشرة

الحاسي بين يدي نقرا ونعود نقرا** الحاسي دوا يلا حطيتيه على الجرح يبرا

الما خمرة والكلمة جمرة ** والحكمة ثمرة من ثمار الغاده العذرا

القد مساوي خد ونهد ** والقصاب داوي بـ هوى خضرا

عبد المالك المومني

عشاق خضرا شحال هما كثره ** غرقو ف اسرار ذيك الكمرا

بوشيار واليعقوبي وشلا شباب ** تقاسوا وطاحو فيها ف خطرا

سر ما جعلو ربي غير ف ذيك العين ** وسحر ما اعطاه غير لـ ذيك النظرا

الله يحسن عوني وعونك وعونهم ** ويبعد علينا كل حزن وهم وحسرا

جمال الدين حريفي

يا الله الله الله الله ** ما حلاه كلام ماحلاها هضرا

هادا عسل هادا خمر ** هادا سر من اسرار الزهرا

المنورة المصورة الزينة ** الراوية الغاوية خت القمرا

المرقرقة المشقشقةالضاوية ** المضوية الشمس الحمرا

عبد المالك المومني

ﮔول ونـﮔول شعر ما بغينا ** كلامنا زين لكن غير هدرا

إلا جينا للصـح والمعقول ** خضرا-ﮔالت بنتي الصغيره -غير حجرا

ضحكت ضحكة البسط ** وبسط لحباب ما هو حكرا

ﮔلت لها يا بنتي قرة العين ** شحال من واد ﮔـهـﮔر من حجرا

هكذا ﮔال ربي عز من ﮔال ** باش ناخذو منو درس وعبره

وشحال غابت و غضبت عليَّ خضرا ** واليوم رضات وغمرني فيضها غمره

جمال الدين حريفي

مانزيد ما نزايد عليك ** يا الحبيب يا اللبيب عاشق خضرا

مازال البنت تكبر وتعقل ** وتعرف بالصدق حق الحجرا

منها نبع ما خمر وحليب ** تولد وترضع بحال المرا

يلا نعسات ورتاحت اتساه ** ويلا فاقت وراقت تعجب ف النظرا

 

 

 

 

 

 

 

تريد أن تضيف تعليقا

اضغط هنا

1

قراءة للأستاذ جمال الدين حريفي بعنوان: نداء المكان: حكاية سيدي احمد القوَّال وما جرى له مع روحانية العين لالة خضرا مولاة الركادة.

2

هدية الموقع للأستاذ الجليل الدكتور عبدالمالك المومني المتشبث بجذوره أينما رحل وارتحل

 

 

الآراء الواردة في التعليقات تعبر عن آراء أصحابها وليس عن رأي المشرف على الموقع

 

 

 

 

 

 

 

 

 

 

 

 

 

 

 

 

 

 

                                                               

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Compteur Global gratuit sans inscription