موقع قبائل بني يزناسن يرحب بزواره الكرام

 

 

                                                           

 

 

 25

 

حكاية الذيب

 

بقلم ذ. محمد مهداوي

 

 ..................حكاية الذيب.............

بْغيتْ نَحْكيلْكُومْ الْيُومْ حْكَايَه

مَ دَوَّنْها لاَ قْلَمْ مَ كَتْبَتْها دْوايَه

كانْ ذيبْ وَسْطْ لَغْنَمْ يَرْعَى

ياكُلْ مَنْ لَكْباشْ بْلاَ شْرَايَه

لَكْباشْ حانْيَه رْيُوسْها خَايْفَه

تَطْلَبْ لَلذِّيبْ حُسْنْ الْهِدَايَه

الذِّيبْ زادْ اتْجَبَّرْ وَاتْعَنْطَرْ

وَالرَّاعي مَسْكينْ نَكَّسْ الرَّايَه

تْجَمْعَتْ لَقْبيلَة فْ واحَدْ اللِّيلَة

شَدُّو الذِّيبْ ناعَسْ تَحْتْ السَّقَّايَه

حَيْدُولُو سْنانُو وَنْيابُو وَضْراسُو

رْماوَهْ وَسْطْ لَغْنَمْ تَلْفَتْلُو لَقْرايَه

وَلاَّوْ الدْراري عْليهْ تَتْهَكَّمْ

وَ الذْيُوبَة عْليهْ نَوَّاحَة بَكَّايَه

هَذا حَالْ كُلْ الِّلي بْغَا يَتْجَبَّرْ

لَا بُدْ تَدَّرْكُو بْحالْ هاذْ النِّهايَه

 

كُلْ واحَدْ لازَمْ ياكُلْ وِي يْعَبَّرْ

 

مَرَّة مَرَّة يْشُوفْ حالُو فْ لَمْرَايَا

 

بقلم محمد مهداوي

                                                                                   

 

 

 

فضاء الزجل والشعر        

          

Compteur Global gratuit sans inscription