محرك البحث أسفله خاص بموقع بني يزناسن فقط
د. الأستاذ عبدالمالك المومني
سيرة ذاتية علمية
مكان وسنة الأزدياد : قرية الرﯖادة بمدينة أبركان، شرق المغرب سنة1951م. المهنة: أستاذ التعليم العالي. المؤسسة مقر العمل :جامعة ابن طفيل-كلية الأداب- شعبة الأدب العربي. وظائف سابقة: § أستاذ التعليم الإعدادي. مدينة فاس (1973م-1976م ). § أستاذ التعليم الثانوي. مدينة فاس (1976م-1985م ). § أستاذ التعليم العالي مساعد: جامعة ابن طفيل –القنيطرة ( 1985م-2004م). الشواهد العلمية: § شهادة الباكلوريا، وجدة1971م. § الإجازة في الأدب العربي: جامعة محمد بن عبدالله،كلية الآداب،فاس.1976م. § شهادة الدروس المعمقة في الأدب العربي القديم، كلية الآداب، فاس.1982م. § شهادة الدروس العليا لتكوين المكوِّنين،كلية الآداب، فاس.1983م. § شهادة ديبلوم الدراسات العليا (ماجستير)في موضوع" شعر السجون في المشرق العربي من البعثة حتى القرن الثالث الهجري" كلية الآداب، فاس.1988م. § دكتوراه دولة في موضوع"روميات أبي فراس الحمداني والتجربة الإنسانية"جامعة محمد الأول ،كلية الآداب، وجدة.2004م. كتب وإبداعات ومقالات منشورة : § "الجناح الهيمان بنبع رﯖادة الوسنان". رواية. منشورات عكاظ:1996م. § " رِيحَةْ لَبْلادْ خَضْرا". ديوان زجل.رَبَانِيت،الرباط، يونيو 2011م. § "التجربة الإنسانية في روميات أبي فراس". دراسة نقدية.دار الكتب العلمية.بيروت.فبراير2010م. § "خضرا والمجذوب" رواية. كلمات للنشر والتوزيع. الرباط 2015. § "المدى المثخن بالأنوار" قراءة في ديوان:"نزيف المدى"للدكتور حسن لشـﯖر،الملحق الثقافي لصحيفة الاتحاد الاشتراكي.23مارس 2003م. § "زمن الوأد أماه" قصة قصيرة.مجلة جسور. دورية تصدرها أكاديمية التعليم.القنيطرة.العدد 4 سنة2000م. § "هي أبهى ليلة الميلاد"،قصة قصيرة صحيفة بيان اليوم،الملحق الثقافي نوار الشمس 4/2/2000. § "نعاس على ركبة أمي"،قصة قصيرة، صحيفة الميثاق الوطني ،الملحق الثقافي4/6/2001م. § " خطاطيف وحية" قصة قصيرة نشرت في الصحيفة نفسها. § "عتمات الأنوار" قصة قصيرة نشرت بصحيفة المنعطف، يونيو 2002م. عدة أنشطة في البحث والتاطير العلمي أيام دراسية وندوات خدمات تربوية وعلمية واجتماعية بكلية الآداب القنيطرة، وخارجها أنشطة ثقافية داخل الكلية وخارجها آخر نشاط هو توقيع رواية خضرا والمجذوب" بنادي المعلمين بأبركان في الصيف الماضي.
قــــــــائمـــــــة عناوين القصائد بالصفحــــــــــة لمن ذيك الدار ...... نبغيك يا خضرا ...... تريفا يا ناس ...... الجَّمرة
زڭزل ...... ف حضرة لحباب ...... مجدوب خضرا ...... التحويسة
سَّمعي يالطرشه ...... وحش الغريب ...... يارايح للعين ...... يا ذاك لعليل
الثلج ف جبالي ...... هْوا خضرا ...... مـقـام ...... زهرة بنعمان ياعشران
عرس لمنابع ...... رمان الدار ...... منامة لعمر
ياطالع ل ذاك جبل لحرار وفايت قريب جنْب ذيك الدار لله گـول لي لمَّن كانت ذيك الدار لـ قريب كان زمان احسن جار وهجر بـ غير خاطر مْواجه الاخطار اخطار الأشرار ف البر ولبحر وهذا شحال ما جات عليه اخبار ولاَّ هي لـ سايح غريب جا زاير ولْقى الجود والهنا واستقر يا لفايت ماشي جنب ذيك الدار وْقَف وسلَّمْ على حيط لحجر وسقف لخْشب ولقْصب والسْمار وفكَّرها يا سيدي ب لَعْب الصْغر و زهْو وزهر الشباب الغالي راها ايام لعمر قصار تمشي وعمرها ما توَلِّي راه خيار الناس هو للي يفكر وخير الايام هي للي تذكَّر بـ للي فات من زمان وللي حضر مع لقريب لعزيز ولحبيب زين النظر اللي ديما يشكر وما ينكر فْضايل الكريم على ذيك الدار جنان دايرب زهر وشجر ب اثمار و الواد يسيل تحت ف عيون غْزار ورْيام وغزلان واردة ب عيون كبار راعيه فـي الأمان ما ناويَه غدر وانعام السخرة والشياه ولبقر واليوم جار عليها الزمان للي دار وذيك الدار يا للي سال وهو حاير عندي أنا واحبابي واضيافي قْصر حتى ولو صارت مع الوقت وليَّام خربه واطلال خاليه ولاّ غار زاوية الوافد ب الليل والنهار مَّا ليها شرفا واسياد ما بهم عار بني زناسن السبوعا لحرار العربان الحُمَر والسُمَرْ وأمازيغ الزوعر ولبرار زينين النظره والعشرة والجوار ملاح القرب و لمناسب ولصهار للّي حبهم وصدق وصفَّى جاورهم وللي سعى بينهم ب عْداوه و شر خاب ولحـگــو ب سعايتو لخسار
عشبه عشبه من عشابك حلوَّه شهْد كانت ولاَّ حدْجه ُمره رطبة كانت ولاَّ مشوّْكه سدره نبغيك آ خضرا ذره ذره من ترابك حبه ولاَّ طوبه صخره ولاَّ حجرة من احجارك زهره زهره من ازهارك مزيـّنه وسط دارك ولا ف خْلا نابته حره فايضه بـ خيرك وخميرك ولاَّ كنتِ خاليه صحرا نبغيك آ خضرا كنت انا ساكن فيك أو كنت مغرَّب برا نبغيك يا عذرا يا مليحة النظره راه حبي ليك نازل من السما قطرا بفضل العالي لكبير تروي بـ رشاشها بذره البذره تكبر تكبر حتى توللي شجره والشجره تلقَّح شجره وتتعودي ليَ جنتي خضرا نسميك جنة " لالَّه خضرا" تكوني بيَ وليَ و نكون بيك وفيك ف ذا لدنيا احباب حُرّ وحُرَّه ونتشوق بيك لـ ذيك الجنة لاخرى ونكون أنا جارك ولاَّ طير من اطيارك نحوم ف سماك وما نشرب غير من ماك وما نتشهى غير اثمارك ونقيل هايم نايم وقايم نغني ب بابك واعتابك احلى اشعاري و اشعارك ونحكي ما عرفت وخايلت الحاضر واللي فات من اخبارك نشهَّر بكنوزك واسرارك يشتاق ليك للي يبغيك غريب غير سامع بيك و لاَّ حبيب درﮔـاتو غَبْره نبغيك آخضرا غرام عقل وفَكره وهْيام هْبال وحيره
تريفا ياناس تربه ذهب واغراس جنان جنه وعين للعين فتنه فيها يحلى تحواس بير عامره وشجرا ثامرا والربيع شلى ألوان الـﯕحوان وبنعمان ومايرمان وناسها يا ناس الهمه والشان والصفا والوفا والسلام أمان والركاده الهايمه وماها حب تريفا ما كفاها هوا لبحر هواها حام غيمه ف سماها نزل حمله وادّاَها انا العطشان لـ ماها جريت وراها هيمان وناسي ياناسي فينكم ياناسي ياللي بكم وْناسي و زهات صينيتي وكاسي ف دارنا لكبيره ولمٍّيمه لفقيره على ركبتها حطيت راسي وحلى لي فياقي ونعاسي ف ذا الزمان القاسي فينكم ياناسي فينكم ياناسي
ذيك النوارَه ب لون الشمس لمسميه الجَّمرا خلات ﯖلبي لهشيش لموحَّش كيف الجَمره وﯖمرا كامله تتلالا ف السما بـ حال النُقرا ضوات على لخليله النعسانه خضرا ف ليلة الربيع والندا ينزل بـ القطره جاني منها ف نْسيم كلام وسلام من بْرَا ردِّيت السلام بـ ﯖول منظوم فـ خطْره وَانا سهران نخفي دمعه حارَّه حُرة توحشت نوَّار الفول والجلبان ف الفدان توحشت سبولة الزرع منعنعه خضرا لاعبَه فيه ألف عشبه مفتّحة بـ زهره حمرا وخضرا وزرﯖـه مداديه وصفرا وبيضه ناصْحه وكحله وذيك بين بين السمرا والسكوم والدوم والـﯖحوان وبنعمان و الغاوياني الكاوياني الداوياني الجمره وعود العسلوج خْضر وطْري طالع وبنين والنبـڴ مازال صغير عاد بان فـ السدره ولحجل يهدل حاضن ف كركور الحجره توحشت ﯖـعادي جنب ساﯖية زينة النظرا العذرا عزيزة النفس الحشوميه قليلة لهدرا خضرا تسقيني من فُم البوش ماها الخْمرا أيام بـ لوصال تجود وشهور تْغبر فـ هجرا وفيضها يا ناس ما شافو إنسان ف الشهرة نهارو يا احباب ما يخلي حد ف دارو ضيعه أو قصر كانت ولاَّ غار فـ حفرا يا من يلقى لي سبَّه لـ زْياره واسبابي كثره مَ صَّاب وعْدَه تجمع الساكن وللي جاي من برَّا والبارود يلعلع والخيل والفرسان منوضين الغبرا ولوزايع واتاي والطعام يفور فوڴ الـﯖـدرا و جمع العشران ف الدوار وقرايْة القرآن واذكار وامداح فـ الدار نْشاد لَسْياد فُقْها وفُقْرا العزوالحريه والدين والنيه وما يرضاو بـ الحـﯖرا ولكلام الزين والبسمه ف العين ولوجه يـﯖدي بالبشره توحشت مساريَا ف جنان الماندرين واللتشين نـﯖيَّل وناكل حبَّه نقطعها بـ يدي أنا مَ الشجره غريبُ وَّحداني وعاشق لاوطاني ياخلاني عذروني وعليل وِلاَ زرت وشفت نشفى ب حول الله ونبرا
يا السايل على زﮔزل راه وطا وواد وجبل و ذاك غار الجَّمل وما ديما سايل ومنظر هايل مزاح وتفاح أزير وزعتر فاح بين حصا ورمل وحجر صفَّاح ورمان سفري يميل على الواد ظليل يفكر ويذكر بوقت جميل وناس ملاح فين واد أوريكا وفين جنة إفران ما ريت مثال لواد زﮔزل طبيعه ورجال وزين يهبل
إلاَ صابتني من زماني غمَّه نعزم و نرحل طاير بـ خيال وتجمعني بـ صحابي لـمَّه ما فيهم غير صاحب حال حكايات واشعار وازجال وأداب وصواب ووفا بـ الكلمه نـﮔول بْلاش الملهى والمقهى هدره خاويه غيبه ونمه وصداع ودخان وشمَّه وحْنا كلنا اولاد انداد لـ ميللي مربوعة القده و الركادة مْخالفة الشده وجراوه المنعنعه وفزوان والمنزل المشعشعه وتنسان والطرشه المعطشه وراس الما ونسمه تريفا الساهله جنه ما ونَعمه ورحمه وحَمَّه وفوغال ما اعلاها قمه فسحه واسعه وسياحه ورياضه وتفريج لـَ لْغمه وفين مَّا حطينا الرحال ثمَّ خويا و بويا ويما و لاَّ خاله و خال و لاَّ عم وعمه وجار يجود بـ نفس ومال كرامه وشهامه وهمه وجامع وأذان يسمَّع أرض روح مشدوده بـ سْما يا خلان الزمان ولمكان الصحه والراحه والهنا ثَمَّ و الخاطر يطرب و يمرح والقلب يرطاب و يفرح بعد ما يكون كحل ظلمه
عاجبني من خضرا ولف وعشره وزين نظرة والخيمة لكبيرة الخير ولخميره من الداخل لحبق ف محابق معلق ومن برا سدره بالنبق مزرزره وعين ماها خمره ما منها سكره صافي يسقسق فضه تبرق مره لِها نفرا ومره لها نكرا شافوني قوم هايم نحوم قالوا مجدوب غايب مسلوب حاضر مغلوب غادي رايح سايح نايح طايح يشطح فقير فـ حضره
خاوتي عشاق الجمال اتافقوا يوم وتواعدوا عزمو وباليدين تشادوا وطلعوا لْـ عز الجبال شعلوا نار فـ طريقهم قامو أتاي فـ بريقهم ونساو- يمكن! اخوتهم للي ما يتشراو بـ مال لله يا خلاني بـ حق للي بالمحنَّا بْلاني ﮔولو لي كيف هي "خضرا" و"الطرشا" ذيك العذرا وإيغزر أومغارُ وفوغال وبـ الصحه تحواسكم والعُقبى مع صحابكم للي من عشقهم صابهم بـ ذوك لمراسم لهبال
لله يا الطرشه يا ذيك الزينه يا للي كنت ف حجر جبلنا ب حال الجنَّه حلي وذنيك لـ ﮔول وافي لولاد هجرك راغَم و تغرب ف كل بلاد وبقيتِ بين عينيه ديما خضرا ب حال مولاتو وللاه خضرا زمان ليام وليالي لسعاد ف وقات المنام و لسهاد ما نساش و ديانك و شْعابك واحبابو لوفيا و احبابك ف جنانك شحال دارو ميعاد ما نساش صبيانك و شبابك وشيابك وجميع رجالك لمجاد فيهم شيوخ الحكمه و الكلمه واصحاب رفاهه و جاه و قيَّاد كيفاش ينساك ف بْعاد وغربه وف حجرك الدافي كان تربَّى كيفاش ينسى الجماعه و اللمه كيفاش ينسى لمواسم و لعياد سمعيني مليح يا الطرشه عمرك ما كنتِ طرشه غير ما سماوْا عديان و حساد
يا وحش الغريب لـ لبير العايمه ولـ لعين النايمه ولـ ريحة التراب ولـ رباعة لصحاب بـ جنب الساقيه ف لَوْطا هايمه حديث واداب والنيه صافيه ولَمحبه دايمة الخير ما خطا ربي وما عطا ف وطني لحبيب
يارايح للعين ومايل لـ للحواسي ميللي وفزوان وجْراوه اشرب منهم حتى تروى وخلي لي كاسي وسلم على ناسي للي سولك علي و للي منهم ناسي وعلى مذبالة العين الركاده القادَّة اسباب هواسي وذْهاب نعاسي
اعتل صديق لي أياما، فبعثت إليه مواسيا: يا ذاك لعليل نعرفك ولد الناس حنين وعفيف وأصيل اسمع مني كُول فـ بلاد الله جول وِلا ملِّيت من برَّا ولِّي وزور لاله خضرا وف جنانها الظليل تسارى وشم زهره وكُول بالصحه ثمره تعفا بـ حول الله وتبرا ومن عين الخليل اشرب واروا ما سلسبيل و هوا ومن وجهو الجميل اغنم نظرا ومعاه سهرا تشفي منُّو غليل وطول الليل سبح حتى للصبح و صلي واقرا تهدا وتهنا وتغنا وما تشوف حياتك ب حول الله عيشه مُره راه زمان لعمر قليل والدنيا كاويه جمره ما يكفيها ويطفيها غير خد بْليل بـ دمعه حاره حُره خشوع وخضوع لـ العالي الجليل وصفا ووفا لـ حب غالي ونْبيل
الثلج ف جبالي هيج لي حالي خلاني نهالي ب وطني واهلي ومَّالي ل خضرا إمارة ل مغربي الغالي حره بنت الحره وبوها مول دين وَالي ماها مدفڴ ما يسالي أرضها جنه خضرا على يميني وشمالي وسْماها ف الليالي نجومها تلالي ب علامها نْشالي ونعلقو ف لعلالي ب عرضها نْبالي وَلْفها المحنه حلا لي و هي بعيده ديما ف بالي قابْلاني ف كل حال ب عقلي و فتنَه هبالي يا لايمني على ذا الحال زورها واشرب وجرَّب و ذوق... ولَخبار تالي ونفديها ب روحي ومالي
شعرت ف غروب يوم ب رعشة غشَّات بدني وكياني ف زمان نار وغبار ليل ونهار حاجب الديار والدروب ذاك هوا عليل من “خضرا” جاني حسّيتو ف رفيف عياني لْغات ب غنَّه وبحَّه مليحة تذوَّب للي ما يذوب يا محبوب وصدحت ب حنَّه حنينه تشيَّب وتلهب الـﮕلب لا تجفيني كفاني وكفاك صهد ليَّام وتوحشنا ذاك الظل و لَهبوب وتوحشنا الميعاد ولمَّة لَمْحنَّه مَ ليَّام الزينه عْزم وجيني ليك عندي اعلى مقام و طيب الطعام ولعسل شهد ومشروب من عيني مدام ما نسقيه غير للي بالنية الصافية يبغيني رواح ليَ يا محبوب ب مراد الله يكمل بيك المرغوب ذاك سر مكنون ما يعلمو غير العليم العالي بينك وبيني عُود ليا بعد هجر وغيار واكدار يا محبوب تصفا لقلوب ياك مايا النقرا الصافيا مرايا كان ديما يرويك ويرويني منبع جاري غزير فـ الانام ولنعام والسهول والسهوب وطينك يا ولفي معدن حر وذهب مقطَّر مصفِّي من طيني نلمُّو الشمل ونَّعمو بالوصل ونشكرو الباري على خير المكتوب هْناك هنايَ يا هنايَ وهمّْ لمحاين كيف يعنيك يعنيني و حْنا روح وحده عجنها ربي من زمان ف جيوب لغيوب هات ليَ ذراعك لمتين سْناد ليَ من غوايل الزمان يحميني ونكون جنبك ساﯖيه جارية ترشك ب ندايا ف حَر اللهوب وهاك خدّي الحمري تراب و الخمري الـﮕـــمري لون جْبيني هوانا روحاني ما هو بدْني شهواني خالي مَ لكدار ولعيوب راه طبعي من طبعك مهيل ساهل وللي يرضيك يرضيني وعرضي من عرضك نقي كامل والستر من ربي مطلوب هاك ﯖلبي لحنين مفتاح روحي وادخُل ب النهار الـﮕهار جناني حيرة وبهره لًّبصر فيه كل ما تتشهَّى م لسمار ولثمار والطيوب عارفاك عفيف ومغيار وغيرتك – ب خلاف الناس- ما تأذيني… كون طير الجنَّه اخضر حر وحوم فيه وتحيَّر كيف المجذوب واصدح ب اسمي ولغا ” يا خضرا” ف سماي الزرﯖـا وغنّيني راني أنا خضرا بالصح ف الفرح والقرح ولَخْصوب والجّْدوب وغْناك ليَ وعليَّ زادي ف الدنيا يا وْحيدي وهو وحدو يَغنيني ذاك ﯖول خضرا صريح ولميح خالي م الغش و لخدع ولكذوب وكلامها ظاهر ف الظاهر – وايَّاك لا تنخدع – راه حمَّال معاني محاسنَه من محاسنها مأصل ما غريب براني سالب مسلوب مْديح وعشاقي عروبي وغيواني ولَّمنابع و لَبحاير بلادي حنَّاني بـ لسان حالي ناطق صادق بايح ب سر لمحبَّه والمحبوب عين مْعانى تقي باقي ولبدن – كيف عرفتو يا لحباب – فاني غافل أنا ساهي شايفينّي ولا فايق والوجه باهي، ولاَّ مكروب عاقل أنا ولاَّ مخبول معلول ﮔولو الخير يا خُّوتي وحَسنو اعواني عبد المالك المومني العبد ضعيف ولعمر خريف والوقت غروب والصلاه والسلام على المرسول رحمه للَّعباد سيدنا محمد العدناني
واحد يا سيادي ولد ناس ملاح غاب فـ بلاد الله وساح وطال غيابو حتى يأسو من رجوعو احبابو هبت عليه من وطانو رياح ركب من شوقـو جناح وزارني بكري ف صباح بحال خيال ف منام ﮔــال لي كلام وبـ سرو باح خايلتو صديق حميم من زمان زمان قديم تقوس ظهرو وغمرو الشيب حن لـ دار لحبيب جاها طاير لـﮕـاها تريب ما شكى ما بكى ما ناح ﯕـيل نهارو واستراح وشمر على ذرعانو الصحاح و على بير كانت مطموره زحزح حجره صفاح واحفر ب ظفرو ما يبالي ب جراح حتى صفا ماها وولَّى خمرا راح وبـ الليل شعل من ﮔلبو مصباح ﮔمرا ضوات على الشعاب ولبطاح توضَّا وصلى عشاه وذكر وراح ب حال شهاب ذاب ف الظلام ليالي يا اسيادي فاتت وايام الدار للي كانت رمام حيطها لمخرب لمريَّب قام ومنبع الجنان النعسان ماه فاق وفاض وساح و الشجر اليابس وللي جاح المايل مسوَّس وللي طاح كحال بالخضورة وخيرو عام وزهرو بـ عطرو فاح وبعد ايام أيام قليله جرات النسايم العليله والليالي اضحات دافيه و بليلة و حيات الخيمه للي كانت خربه وعلات وسطها قبه ووساع فيها لمراح ومالْها فـ وطاها ما حسبو سرَّاح وصارت مزار ومقام ولمة مواسم وافراح وزاوية الزاهد والعابد قصدها المغموم المهموم ناوي يسكن لخيام ويجاور الناس لكرام باغي يرتاح
زهر بنعمان يا عشران وسط الزرع والـﮔحوان روح إنسان هام بـ عين للاخضرا تحول لـ قـلب خافق بدم لحمر دافق يرف لـ كل هبة ريح جات من جهة للا خضرا من ماها شرب و روى وفـ وطاها لقح وقوى وعمرو ما ذبال ولوى وكان لو فيها وبها شان همس لـ خليلو كلام عنـﯖو بـ سلام وتلاﯖات البذره بـالبذره سـﯖـاتهم لاله خضرا ب ماها الخمرا وطاحو ما عـْباوا ب سكرا ومن ذاك العام وكل عام ووسط الزرع والـﮔحوان وبين ألف زهره وزهره تطلع ف الربيع زهره هي قلب فـ الصوره واللون حمرا يشبه خد عذرا جات ف شمس الضحى تسـﯖـي من عين لاله خضرا فاجأها عشيق بـ كْلام رقيق وعفة هدرا قال ليها حادر العين وحشمان نبغيك يا ثمرة خضرا وكان للي كان.. من زريعة بنعمان.. حبتين جازو وجالو بلدان وروحين سكنو ابدان يا لمساري ف جنان خضرا تكفيك من ذيك الزهرا نظرا وقيَّس الخطوه وتكايس راه ذيك الزهرا الحمرا روح وحده لـ إنسان وإنسان خفيفه ورهيفه شريفه وعفيفه فيض رحمه ومحبه من روح لكريم الرحمان
ما فـاض فْـــ الواد سال وساح وصاح طير حر فْــ لبلاد طار وعلاَّ فـــ السما ينادي أنا فارس فزوان جيت مْ لَعماق بجيادي وجوادي طالب راغب فْمولاتي جراوه جارتي وحبي وحياتي من الزمان الآول بنت لاصل والمفصل ولجواد ولمجاد قرينت ميللي المليانه وخضرا الركادة النعسانه الخمريه المزيانة والعين حورية لجنان والقد قايم خضر وعامر والخد تفاح احمر والسفري رمان والسوالف يالحباب داليا مدليا والحوض نعناع مشعشع ريان والقصبه دايرا بيه تميل شمال و يمان حانية عليه وتغني ليه ب لْغا حنان أنا فزوان مايا صافي حامي ودافي روا ودوا لكل عليل وِيلا جرى بفم الحبيبا يبرد ويحلى شهد يشفي لغليل يا اهل لبلاد مرحبا بكم ومرحبا بكل بعيد وقريب هذا يوم عيدي وكل يوم هو عيدي وسعد سعودي البوم يوم عرسنا أنا و لحبيب
رمان داري سفري لونو حمر عكري ترابو خصيب حمري والساكيه تحتو من فيض الركاده ديما كانت تجري شوفتو خلاَّبه تغري إلاَ اشتهاه جاري مرحبا بيه ف داري يذوقو ف وقتو بكري وسعداة للي غرسو وكل ما طال فرسو وردو نجمه حمرا تبري وحَبو إيلاَ شبع ما خمري شكلو رمز ضاوي مْنار ل لعشق حار كي النار ظاهر طاهر عذري
فـ ليله صافيه وفـ طريق الساقيه وانا ب لعيا مهدود لعقل ف شرود والعين ساهيه طاف بيَ خيال وليَّه الحال والجمال جنّيه صابني بـ هبال وتبعتو نبغي وصال ومن كثر خبالي ضيعت نعالي و حسيت بـ راسي جنب عين نايمه ا ستغربت وسولتني لايمه ياك آلعزيز ما ما عرفتني؟ تـﮔول عمرك ما شفتني؟ أنا الناعسه لوليَّه العذرا للاك ولالة الناس "خضرا" يا ما انت بيَ همت وفـْ مايَ ياما عمت ياك ما كبرت ونسيت وانا ليك مازالا وفيَّه ﮔلت وانا مبهور وبـزينها مغرور سمحي لي يا قرة عياني الوحش ولبعاد اعماني حاشا يا لالَّه ولالة الناس نَّكرك أنا ف فياقي ومنامي نذكرك تكفيني من ماك رشه ونبني بـ جنبك عشه ونسكن قريب حذاك نصبح ونقيَّل فيك ونعشي ونمسي معاك وذا عهدي ليك عمري ماننساك حضنتني فـ حجرها لخليلة وارتاحت نفسي لعليلة ذاك منامي ذيك الليله وعمري كلو نهار و ليله من نبع "خضرا" نابع وطريق ساﯖيتها تابع ومن شافني حافي حاني بغيتو يحسن عوني ويـﮕول الله يبقي الستر والله يجيب من يعذر